ನೀನಿರದ ಹೊತ್ತು ಹೆಜ್ಜೇನು ಕಡಿದಂತೆ 
ನೀನಿದ್ದ ಹೊತ್ತು ಸಿಹಿಜೇನ ಸವಿದಂತೆ 
ಮುಗಿಲ ತುಂಬಾ ತಾರೆಗಳು ತುಂಬಿದಂತೆ 
ಮನದ ತುಂಬಾ ನಿನ್ನ ಅಂದದ ಮೊಗವೇ ಕಾಣುತ್ತಿದೆ 
ಎಲ್ಲಾದರೂ ಇರು ಹೇಗಾದರೂ ಇರು 
ಆದರೆ ನಿನ್ನ ಮನಸನ್ನು ಮಾತ್ರ ನನ್ನಲ್ಲೇ ಬಿಡು 

ಓ ಹುಚ್ಚು ಮನಸೇ ಹಚ್ಚಿಕೊಳ್ಳಬೇಡ 
ಯಾರನ್ನೂ ನೀ ಅತಿಯಾಗಿ 
ಪ್ರೀತಿಸು  ನೀ ಎಲ್ಲರನ್ನು ಮಿತವಾಗಿ 
ನೀ ಹಚ್ಚಿಕೊಂಡ ಮನಸಿಗೆ ನಿನ್ನ ಪ್ರೀತಿ ಇಷ್ಟವಾಗದಿದ್ದರೆ 
ಅದಕ್ಕೆ ಹೊಣೆ ನಿನ್ನ ಮನಸು ಅಲ್ಲ 
ಆ ಮನಸು ಅಲ್ಲ ಎಲ್ಲ ವಿಧಿ ಅಷ್ಟೇ 
ಹಾಗೆಂದೇ ಕೇಳು ನನ್ನ ಮಾತು 
ಮಿತಿಯಲ್ಲಿದ್ದರೆ ಪ್ರೀತಿ ನಿನ್ನ ಜೀವನ ನಿರ್ಭೀತಿ 

ಸುಂದರ ಹೂವಿನ ಹಾಗೆ ಮುಖ ಅರಳಿಸಿ 
ಸದಾ ಮೊಗದಲ್ಲಿ ಮುಗುಳ್ನಗೆ ಬೀರುತ್ತಾ 
ದಿನ ಆರಂಭಿಸಿ ಎಲ್ಲರ ಪ್ರೀತಿಯ ಗಳಿಸುತ್ತಾ 
ಎಲ್ಲರ ಹೃದಯದಲ್ಲಿ ಮನೆ ಮಾಡಿದ ನೀವು 
ಸದಾ ಜನತೆಯ ಕಾಳಜಿಯಲ್ಲೇ ಜೀವನ ಸವೆಸುವಿರಿ 

ಗಿಡಮರಗಳ ನಡುವೆ ಬೆರೆಯುತ್ತಾ ಗುಡ್ಡ ಬೆಟ್ಟಗಳ 
ಪ್ರೀತಿಸುವ ನಿಮ್ಮನ್ನು ನಿಸರ್ಗ ಮಾತೆಯ ಮುದ್ದಿನ 
ಮಗುವೆಂದು ಕರೆಯುವ ಮನಸಾಗಿದೆ ನನಗೆ 

ಎತ್ತರದ ಸ್ಥಾನದಲ್ಲಿದ್ದರೂ ಸರಳತೆಯೇ ಸರ್ವಶಕ್ತಿ 
ಎಂದು ಬದುಕುವ ನಿಮ್ಮ ಉತ್ಸಾಹಕ್ಕೆ ನನ್ನದೊಂದು ನಮನ 
ಸದಾ ಸಂತಸ ತುಂಬಿದ ನಂದನವಾಗಲಿ ನಿಮ್ಮ ಜೀವನ 
ಎಂದು ಈ ಕ್ಷಣ ಹಾರೈಸುತ್ತಿದೆ ನನ್ನ ಮನ 

ಬಾಳೆಂಬ ಪಯಣದಲ್ಲಿ ಸಾಗುವಾಗ 
ನೆನಪಿನ ನಿಲ್ದಾಣಗಳು ನೂರಾರು 
ನಿಲ್ದಾಣದಲ್ಲಿ ನಿಂತು ಕಣ್ಣಾಡಿಸಿದಾಗ 
ನೋವು ನಲಿವುಗಳು ಹಲವಾರು 
ಮಾತಿಂದ ಆದ ದುಗುಡ ಒಂದು ಕಡೆ 
ಮೌನದಿ ಆದ ಆತಂಕ ಮತ್ತೊಂದು ಕಡೆ 
ಜೀವನದ ಸುಳಿಯಲಿ ಸಿಕ್ಕಮೇಲೆ ಈಜಲೇಬೇಕು 
ಸಾವಿನ ದಡವ ಸೇರಲೇಬೇಕು

ಕಣ್ಣು ನನ್ನದಾದರೂ ಅದರಲ್ಲಿ ಕಾಣುವ ಕನಸು ನಿನ್ನದೇ 
ಧ್ವನಿ ನನ್ನದಾದರೂ ಅದು ನುಡಿಯುವ ನಾದ ನಿನ್ನದೇ 
ಜೀವ ನನ್ನದಾದರೂ ಅದರೊಳಗೆ ಬೆರೆತಿರುವ ಉಸಿರು ನಿನ್ನದೇ 
ಈ ಭಾವಗಳ ಬೆರೆಸಿ ಬರೆದ  ಕವಿತೆ ನನ್ನದಾದರೂ 
ಅಲ್ಲಿ ಹರಿಯುತಿರುವ  ಒಲವು ನಿನ್ನದೇ ಓ ಹುಡುಗ 

ಬೇಡಿದಾಗ ಬರದ ಹುಟ್ಟು ಸಾವಿಗೆ ಕಾಯುದ್ಯಾಕೆ
ಹುಟ್ಟು ಆಕಸ್ಮಿಕ ಸಾವು ಅನಿರೀಕ್ಷಿತ 
ಹುಟ್ಟು ಸಂತೋಷ ಕೊಟ್ಟರೆ ಸಾವು ದುಃಖ ಕೊಡುವ ಹಾಗೆ 
ಮನಬಂದಂತೆ ಚುಚ್ಚಿದರೆ ನೋವಾಗುವುದು ಮನಸಿಗೆ 
ಅನಿರೀಕ್ಷಿತ ಅಚ್ಚರಿಗಳು ಮುದ ನೀಡುವುವು ಹೃದಯಕ್ಕೆ  
ಸಿಕ್ಕ ಭಾಗ್ಯವ ಬಿಟ್ಟು ಸಿಗದ ಭಾಗ್ಯಕ್ಕೆ ಪರಿತಪಿಸುವಾಗ 
ಪಡೆದುಕೊಳ್ಳುವ ಹುಮ್ಮಸ್ಸಿನಲ್ಲಿ ವಾಸ್ತವ ಕಳೆದು ಹೋದರೆ 
ಭವಿಷ್ಯಕ್ಕೆ ಆಸರೆ ಇರುವುದಿಲ್ಲ ಅಲ್ಲವೇ ಓ ಮನಸೇ...????

ಸಾಗುತ್ತಾ ಹೋದೆ ನಾ ನೆನ್ನೆ ದೂರದ ಯಾನಕ್ಕೆ 
ಅರಿಯದ ಮನಸುಗಳ ಜೊತೆ ಬೆರೆತು ನಕ್ಕು ನಲಿಯಲು 
ಸುಂದರ ಪ್ರಕೃತಿಯ ಮಡಿಲಲ್ಲಿ 
ಹೊಸ ಸ್ನೇಹಿತರ ಜೊತೆಯಲ್ಲಿ 
ಒಬ್ಬರೊಬ್ಬರ ಭಾವನೆಗಳ ಹಂಚುತ 
ಕಳೆದ ಸಮಯ ಕಡಿಮೆಯಾದರೂ 
ಮನದಲ್ಲಿ ನೆಟ್ಟ ಸುಂದರ ಸವಿನೆನಪಿನ ಬೇರು ಮಾತ್ರ ಶಾಶ್ವತ 

ನೀನೆಲ್ಲೋ ನಾನೆಲ್ಲೋ ಒಂದು ಕಾಲದಲ್ಲಿ
ಹೇಗೋ ಅರಿಶಿನ ದಾರದ ನಂಟಾಯಿತು ಅಮೃತಘಳಿಗೆಯಲಿ
ಒಲವಿನ ಸವಿಯ ಸವಿಯುತ್ತ ಕ್ಷಣಗಳ ಎನಿಸುತ್ತಿದ್ದೆವು
ಆನಂದದಲಿ ವರುಷಗಳೇ ಉರುಳಿದ್ದು ಅರಿವಿಗೆ ಬಾರದೆ ಹೋಯಿತಲ್ಲ
ಪ್ರೀತಿ ಪ್ರೇಮ ವಾತ್ಸಲ್ಯಗಳ ನಂದನ ನಮ್ಮ ಮನೆಯಾದರೆ 
ಅದನು ಬೆಳಗುವ ಶಕ್ತಿಯಿರುವ ಬೆಳಕೇ ದೀಪ
ಒಲವಿನ ಮಳೆಯಲಿ ಮಿಂದ ನಮ್ಮಿಬ್ಬರ ಬದುಕು
ಚಿರಕಾಲ ಬೆಳಗುತಿರಲಿ ನಂದಾದೀಪವಾಗಿ