Thursday 30 July 2015

ಸದಾ ಹಸನ್ಮುಖಿಯಾಗಿ ಜೀವನದ ಸೂತ್ರವ ಹೇಳುತ್ತಾ 
ವಿಜ್ಞಾನ ತಂತ್ರಜ್ಞಾನದ ಬೆಳವಣಿಗೆಗೆ ಶ್ರಮಿಸುತ್ತಾ  
ಮಾಡುವ ಕಾಯಕದಲ್ಲೇ ದೇವರನ್ನು ಕಂಡ ನಾಯಕ 
ಕೋಟಿ ಕೋಟಿ ಜನಗಳ ಮನಗೆದ್ದ ಮರೆಯಲಾಗದ ಮಾಣಿಕ್ಯ 
ನೀವು ನಗು ನಗುತ್ತಲೇ ಜಗವ ಆ ಬಿಟ್ಟ ಕ್ಷಣ 
ಶತಕೋಟಿ ಜನರು  ಕಂಬನಿ ಹರಿಸಿದರು ತುಂಬಿ ಮನ 
ಓ ಮುದ್ದು ಕಲಾಂ ತಾತ ನಿಮಗಿದೋ ನನ್ನ ಅಂತಿಮ ಸಲಾಂ         

Tuesday 28 July 2015

ಮುದ್ದು ಮಕ್ಕಳ ಮುದ್ದಿನ ಮೇಷ್ಟ್ರು ನೀವಾಗಿ 
ವಿಜ್ಞಾನ ಲೋಕದ ವಜ್ರವಾಗಿ ಕಂಗೊಳಿಸುತ್ತಾ 
ಮಾನವನ ಮೌಲ್ಯಗಳ ಇಡೀ ಮನಕುಲಕ್ಕೆ ಅರ್ಥೈಸಿ 
ಭಾರತ ರತ್ನವ ಸ್ವೀಕರಿಸಿದ ನಮ್ಮೆಲ್ಲರ ಹಿರಿಮೆಯ 
ಕಲಾಂ ಅಜ್ಜನಿಗೊಂದು ಮನಸ್ಪೂರ್ವಕ ಸಲಾಂ 

Monday 27 July 2015

ಮನಸೇಕೋ ಆಗಿದೆ ಇಂದು ಖಾಲಿ ಖಾಲಿ 
ಪದಗಳೆಲ್ಲ ಆಗುತ್ತಿವೆ ಚೆಲ್ಲಾಪಿಲ್ಲಿ 
ಭಾವನೆಗಳ ಎಣಿಸಿ ಪದಗಳ ಬೆರೆಸಿ ಕವನವ 
ಬರೆಯುವ ಆಸೆ ಹೋಗುತಿದೆ ಎಲ್ಲಿ...???

Tuesday 21 July 2015

ನನ್ನ ಎದೆಯೆಂಬ ಭುವಿಯೊಳಗೆ ಬಿತ್ತಿರುವೆ ಒಲವಿನ ಬೀಜವ 
ಪ್ರೀತಿಯ ಪನ್ನೀರು ಸುರಿದರೆ ಉದಯಿಸುವುದೇನೋ ಪ್ರೇಮ ಪುಷ್ಪ 
ಆ ಪುಷ್ಪ ಬಯಸುತಿದೆ ಪ್ರೀತಿಯ ಪರ್ವತದ ತುದಿಗೆ ಏರಲು 
ಅದಕ್ಕೆಂದೇ ಕಾಯುತಿದೆ ಪ್ರೆಮಗಂಗೆಯ ಹರಿಸುವ ಮನವು ಬರಲು 

Sunday 12 July 2015

ಮೌನದಿ ಬರೆದ ಕವನವ ಮಾತಲಿ ಹೇಳಲಿ ಹೇಗೆ 
ಅರಿಯದೇ ಬಂದ ಪ್ರೀತಿಯ ಕೀಳಲಿ ಹೇಗೆ 
ನೂರಾರು ಆಸೆಗಳು ಚಿಗುರುವ ಸಮಯದಿ 
ಸಾವಿರಾರು ಮೈಲಿಗಳಷ್ಟು ದೂರ ಬಿಟ್ಟು ಓಡಲಿ ಹೇಗೆ 

Wednesday 8 July 2015

ನೀ ಕವಿಯಾದರೆ ನಾ ನಿನ್ನ ಪದಗಳಲ್ಲಿ ಕುಣಿಯುವ ಕವಿತೆ 
ನೀ ವೈಣಿಕನಾದರೆ ನಾ ನಿನ್ನ ಕೈಯಿಂದ ಮೀಟುವ ವೀಣೆ 
ನೀ ಬಾನಷ್ಟು ಎತ್ತರದಲ್ಲಿದ್ದರೆ ನಾ ಇಂದಲ್ಲ ನಾಳೆ ಮೇಘ 
ಸಂದೇಶ ಬರುವುದೆಂದು ಕಾಯುತ್ತಿರುವ ಭೂಮಿ 
ನೀ ಇಂಪಾಗಿ ಹಾಡುವ ಕೋಗಿಲೆಯಾದರೆ ನಾ ನಿನ್ನ 
ದನಿಯಿಂದ ಹೊರಡುವ ಸಂಗೀತ ಸುಧೆಯು 
ನೀ ಎಲ್ಲಿದ್ದರೂ ಹೇಗಿದ್ದರೂ ನಾ ನಿನ್ನ ನೆರಳಾಗಿ  
ಬಾಳಿಗೆ ಜ್ಯೋತಿಯಾಗಿ ಬೆಳಗುವ ಉಷೆಯೂ 

Monday 6 July 2015

ಮನವೊಂದು ಪುಸ್ತಕದಂತೆ 
ಅಲ್ಲಿ ಬರುವ ಆಸೆ ಕನಸುಗಳೆಲ್ಲ ಪುಟಗಳಂತೆ 
ಸುಂದರ ಭಾವಗಳನು ಬೆರೆಸಿ 
ಒಳ್ಳೆಯ ಯೋಚನೆಗಳ ಪೋಣಿಸಿ ಬರೆಯುವ 
ಆಸೆಯು ಕೈಗೂಡಿದರೆ ಬಾಳೊಂದು 
ಬೆಳಗುವುದು ನಂದಾದೀಪದಂತೆ 

Thursday 2 July 2015

ಭಾವಗಳ ಬೆರೆಸಿ ಮೌನದಲೇ ಕವಿತೆಯ ಬರೆಯುವಾಸೆ 
ಕಾರಣ ಮಾತುಗಳೆಲ್ಲ ಮಂಜಿನಂತೆ ಕರಗುತಿವೆ 
ನುಡಿಗಳ ಪೋಣಿಸಿ ಕವನದ ಹಾರವ ಮಾಡುವ ಆಸೆ 
ಅದಕ್ಕೆಂದೇ ಪದಗಳ ಗುಂಪನು ಹುಡುಕುತಿರುವೆ