ಊಟಕ್ಕಾಗಿ ಹಸಿದ ಹೊಟ್ಟೆಯನ್ನು ತುಂಬಿಸುವುದಕ್ಕಿಂತ ಕಷ್ಟ 
ಪ್ರೀತಿಗಾಗಿ ಹಸಿದ ಹೊಟ್ಟೆಯನ್ನು ತುಂಬಿಸುವುದು 

ದುಃಖ ಎನ್ನುವುದು ಸಾಗರದಂತೆ 
ಇಳಿಹೊತ್ತಿನಲ್ಲಿ ಬರುವ ಅಲೆಯಂತೆ ಹರಿಯುವುದು 
ಕೆಲವೊಮ್ಮೆ ಸಮುದ್ರದ ಅಲೆ ಶಾಂತವಾಗಿದ್ದರೆ 
ಮತ್ತೊಮ್ಮೆ ನಾಶ ಮಾಡುವಂತೆ ಏಳುವುದು 
ಅದಕ್ಕೆ ಜೀವನದ ಸಮುದ್ರದಲ್ಲಿ ಮುಳುಗುವ ಭಯವ ಬಿಟ್ಟು 
ಈಜುವ ಕಲೆಯ ಕಲಿತು ಬದುಕಿನ ಬುನಾದಿಯ ಕಟ್ಟು 

ನಿನ್ನ ಮನಸಿಗೆ ಬಂದ ಕನಸನ್ನು ವ್ಯರ್ಥ ಮಾಡಬೇಡ 
ಆ ಕನಸನು ನನಸು ಮಾಡುವ ಪ್ರಯತ್ನ ಬಿಡಬೇಡ 
ಕಾರಣ ಇಂದು ಕನಸು ಎಂಬ ಬೀಜ ಬಿತ್ತಿದರೆ 
ಭರವಸೆಯ ನಾಳೆಗಳೆಂಬ ಫಲ ಬೆಳೆಯುವುದು 

ಪುಸ್ತಕ

ಕುಳಿತಲ್ಲೇ ಜಗತ್ತನ್ನೇ ಸುತ್ತಿಸುವ  ವಾಹನ 
ನವರಸಗಳನ್ನು ಅನುಭವಿಸುವ ಸಾಧನ 
ಓದುತ್ತಾ ಹೋದಂತೆ ಆಗುವುದು ರೋಮಾಂಚನ 
ಅದಕೆ ಕಾರಣ ಕವಿಯ ಅಭೂತಪೂರ್ವ ಕಲ್ಪನ 

ವೀಣೆಯ ಮೀಟುವವರೆಗೂ ವೀಣೆಯೆನಿಸದು 
ಹಾಡನ್ನು ಹಾಡುವವರೆಗೂ ಹಾಡೆನಿಸದು 
ಹಾಗೆ ಹೃದಯದಲ್ಲಿ ಅಡಗಿದ ಪ್ರೀತಿಯ 
ಕೊಡುವವರೆಗೂ ಪ್ರೀತಿ ಎನಿಸದು 

ಮಳೆಯಿಲ್ಲದೆ ಕಳೆಗುಂದಿದ ಮರದಂತೆ 
ಪಂಜರದೊಳಗೆ ಸಿಕ್ಕಿಬಿದ್ದ ಹಕ್ಕಿಯಂತೆ 
ಸಣ್ಣ ಬಟ್ಟಲಲ್ಲಿ ವೃತ್ತಗಳನ್ನು ಎಳೆಯುವ ಮೀನಿನಂತೆ 
ಕ್ರೋಧದಿಂದ ಜಿಗುಪ್ಸೆಗೊಂಡ ಹುಲಿಯಂತೆ 
ಬಿಸಿಲಿನ ತಾಪಕ್ಕೆ ಬಾಡುವ ಸುಮದಂತೆ 
ಬರಗಾಲದಿಂದ ಒಣಗಿದ ಸರೋವರದಂತೆ 
ನಾ ನಿನ್ನಿಂದ ದೂರಾದ ಕ್ಷಣ 
ಪರಿತಪಿಸುವುದು ನನ್ನ ಮನ 

ಮೌನ ಸಮುದ್ರವಿದ್ದಂತೆ ಮಾತು ನದಿಯಂತೆ 
ಮೌನಕ್ಕಿಂತಲೂ ಸುಂದರವಾದ ಮಾತಿದ್ದರೆ ಮಾತಾಡು 
ಕಾರಣ ನದಿ ಎಷ್ಟೇ ಉದ್ದ ಹರಿದರೂ 
ಕೊನೆಗೆ ಸೇರುವುದು ಸಾಗರವನ್ನೇ 
ಹಾಗೆ ಮಾತು ಎಷ್ಟೇ ಉದ್ದ ಬೆಳೆದರೂ 
ಕೊನೆಗೆ ಶರಣಾಗುವುದು ಮೌನಕ್ಕೆ 

ನಿನ್ನ ಜೀವನ ಒಂದು ಪುಸ್ತಕದಂತೆ 
ಒಂದೇ ಬಾರಿ ಕೊನೆಯ ಪುಟಕೆ ಹಾರಲು ಯತ್ನಿಸಬೇಡ 
ಅದಕೆ ಜೀವನದ ಪ್ರತೀಕ್ಷಣವನ್ನು ಆನಂದಿಸು 
ಪ್ರತೀ ಪುಟವನ್ನು ಸುಂದರ ಸವಿನೆನಪಿಂದ ತುಂಬಿಸು 

ಆನಂದದಲ್ಲಿ ಅರಳಿದ ಕವಿತೆ ಮಾಡುವುದು 
ಸುಂದರ ಸ್ವಪ್ನಗಳ ಕುಡಿಕೆ 
ನೋವಲ್ಲಿ ಗೀಚಿದ ಕವಿತೆ ಆಗುವುದು
ಪರರಿಗೆ ಸಾಂತ್ವನದ ಹೊದಿಕೆ