ಬಾಳೊಂದು  ಹೋರಾಟ 
ಕಲಿಸುತ್ತಲೇ  ಇರುವುದು ದಿನಕ್ಕೊಂದು ಪಾಠ  
ಬಂಧನಗಳ ನಂಬಿ ಬದುಕಿದರೆ ನೋವು ಕಟ್ಟಿಟ್ಟ ಬುಟ್ಟಿ 
ಇದೇ ಅಲ್ಲವೇ ಬದುಕಿನ ಮೂಲ ಸೃಷ್ಟಿ 
ಕೊರಗಿ ಬೆಂದು  ಬಾಡಬೇಡವೇ ಹುಚ್ಚು ಮನವೇ 
ಇಲ್ಯಾರು ಇರರು ನಿನಗಾಗಿ 
ಅವರವರ ಬದುಕೇ ಹೆಚ್ಚು ಅವರಿಗಾಗಿ 
ಬಿಟ್ಟು ಬಿಡು ನನ್ನವರೆಂಬ  ವ್ಯಾಮೋಹವ 
ಸ್ವಚ್ಛಂದವಾಗಿ ಬದುಕು ನೆನೆದು ನಿನ್ನ ನಿರ್ಮಲ ಮನವ

ಎಲ್ಲರೂ ನನ್ನವರೇ ಎಂದು ನಂಬಿ ಪ್ರೀತಿಸಬೇಡ ಹುಚ್ಚು ಮನವೇ 
ನಿನ್ನ ಪ್ರೀತಿ ನಂಬಿಕೆಗೆ ಯೋಗ್ಯರಲ್ಲ ಎಲ್ಲರೂ 
ಅವರಿಗಿಲ್ಲದೇ ಹೋಗುವುದು ಕೆಲವೊಮ್ಮೆ ನಿನ್ನ ಮಮತೆಯ ಅರಿವೇ 
ಅರ್ಥೈಸಿ ಬದುಕಿದರೆ ಆಗುವರು ಅವರೂ ಸಹ ನಿನಗೆ ಪ್ರಿಯರು 
ನೀ ಕೊಟ್ಟ ಪ್ರೀತಿಗೆ ಬಯಸದಿರು ಅವರ ಪ್ರೀತಿಯ 
ಸಿಗದಿದ್ದರೆ ಹಾಕದಿರು ಅವರಿಗೆ ಹಿಡಿ ಶಾಪವ 
ನಿನ್ನ ನೀನು ನಿಯಂತ್ರಿಸಿದರೆ ನಿನಗಿಲ್ಲ ನೋವು 
ಬಿಟ್ಟು ಬದುಕು ಎಲ್ಲರ ಚಿಂತೆ ಆಗ ಸಿಗುವುದು ನೆಮ್ಮದಿಯ ಸೂರು 

ನೀ ಇಂದು ಹೋಗುತಿರುವೆ ನನ್ನಿಂದ ದೂರಾಗಿ  
ತಿರುಗಿ ಬರುವೆ  ಮತ್ತೆ ಕೂಡಿ ಬಾಳಲು ಶಾಶ್ವತವಾಗಿ 
ವಿರಹದಲ್ಲೂ ಸುಖವಿದೆ ಎಂದು ಅನಿಸುತಿದೆ 
ಕಾರಣ ಕಣ್ಮನಗಳಲ್ಲಿ ನಿನ್ನೊಲವೇ ತುಂಬಿದೆ 
ಪ್ರತೀ ಕಲ್ಪನೆಯಲಿ ಕನಸಲ್ಲಿ ಕುಣಿದು ನಲಿದು ಹೋಗುವೆ 
ನಿನ್ನ ನೆನಪಾದ ಕ್ಷಣಗಳೆಲ್ಲ ರಂಗು ರಂಗಾಗಿ ಭಾಸವಾಗಿದೆ 
ಕಾಯುವುದರಲ್ಲೂ ಹಿತವಿದೆ ತಾಳ್ಮೆಗೆ ತಕ್ಕ ಫಲವು ಇದೆ 
ಎಲ್ಲಿದ್ದರೂ ಓಡೋಡಿ ಬಾರೋ ಹುಡುಗ 
ಕೇಳಿಸುತ್ತಿಲ್ಲವೇ ನನ್ನ ಮನದ ದುಗುಡ 
ಬೇಗನೆ ಸಾಗಲಿ ಈ ವಿರಹ ಸೇರಲು ಕಾದಿರುವೆ ನಿನ್ನ ಸನಿಹ 

ಅಂಚೆ(POST) ಮಿಂಚಂಚೆ(EMAIL)
**********************************************
ಓ ಅಂಚೆಯಣ್ಣ ಹೇಗಿದ್ದಿಯಪ್ಪ 
ಒಂದಾನೊಂದು ಕಾಲದಲ್ಲಿ ನೀನೆ ಜಗಕೆಲ್ಲ ಸಂಪರ್ಕ ಸಾಧನ 
ಸುಖದ ಸುದ್ದಿ ಇರಲಿ ನೋವಿನ ಸುದ್ದಿ ಇರಲಿ ವ್ಯವಹಾರವಿರಲಿ 
ನಿನ್ನಿಂದಲೇ ಹೋಗುತ್ತಿತ್ತು ಸಂದೇಶ ತಿರುಗುತ್ತ ದೇಶ ವಿದೇಶ 
ಎಂದು ಬಂತೋ ಮಿಂಚಂಚೆ ಮರತೇ ಬಿಟ್ಟರು ಹಳೆಯ ಅಂಚೆ 
ಇಮೇಲ್ ಫೇಸ್ಬುಕ್ ವ್ಹಾಟ್ಸಪ್ ಇವುಗಳದೇ ಹಾವಳಿ 
ಎಲ್ಲೆಂದರಲ್ಲಿ ಮನ ಬಂದಂತೆ ಮಾಡುತಿವೆ ಜಗದ ತುಂಬಾ ದಾಳಿ 
ಅದಕ್ಕೆ ನೊಂದು ಬರೆಯುತಿರುವೆ ಅಂಚೆಯಣ್ಣನ ಅಳಲು 
ಮತ್ತೆ ಬರಿಸಲು ಅವನ ಮೊಗದ ಮೇಲೆ ಹರ್ಷದ ಹೊನಲು 

ಓ ಕವಿತೆಯೇ..... 
ತೋಚಿದ್ದು ಗೀಚಿದೆ ಅನಿಸಿದ್ದು ಹೇಳಿದೆ 
ಒಲವನ್ನು ತೋಡಿಕೊಂಡೆ ನೋವನ್ನು ಹಂಚಿಕೊಂಡೆ 
ಗೆಳೆಯರನ್ನು ಪಡೆದೆ ಅಭಿಮಾನದ ಹೊಳೆಯಲ್ಲಿ ಮಿಂದೆದ್ದೆ 
ನಗು ಅಳು ಸ್ನೇಹ ಪ್ರೀತಿ ತ್ಯಾಗ ವಿಶ್ವಾಸ ಹೀಗೆ 
ಮತ್ತೊಂದು ಮಗದೊಂದು ಸೇರಿಸುತ್ತ 
ಭಾವನಾತ್ಮಕ ಬೆದರಿಕೆಗಳನು ಎದುರಿಸಿದೆ 
ಆದರೂ ಬಿಡಲಾಗುತ್ತಿಲ್ಲ ಬರೆಯುವುದನ್ನು ನಿನ್ನಲ್ಲಿ 
ನೀನೆ ಕೈಬಿಟ್ಟರೆ ಮತ್ತಾರು ಆಸರೆ ನನಗಿಲ್ಲಿ 

ನಾಳೆ ಏನಾಗುವುದೋ ಗೊತ್ತಿಲ್ಲ ನೆನ್ನೆ ಆಗಿದ್ದು ಬೇಕಾಗಿಲ್ಲ 
ಭೂತ ಭವಿಷ್ಯಕಾಲಗಳ ನಡುವೆ ವಾಸ್ತವ ಹಾಳಾದರೆ 
ಆ ಕ್ಷಣಗಳು ತಿರುಗೆಂದೂ ಬರುವುದಿಲ್ಲ 
ಪ್ರತೀಕ್ಷಣ ಅನುಭವಿಸಿ ಬದುಕಿದರೆ ಬಾರದು ನಾಳೆಯ ಚಿಂತೆ 
ವಾಸ್ತವ ಅರಿತರೆ ಪಡುವುದಿಲ್ಲ ನೆನ್ನೆಯ ನೆನದು ಸುಮ್ಮನೆ ವ್ಯಥೆ 
ಶ್ರದ್ದೆಯಿಂದ ದುಡಿಯೋಣ ದ್ವೇಷ ಕೋಪಗಳ ಮರೆಯೋಣ 
ನಾವು ಬದುಕಿ ಪರರನ್ನು ಬದುಕಿಸಿ ಜೀವನವೆಂಬ ಪಯಣವ ಮುಗಿಸೋಣ 

ನಾ ಸೈನಿಕನ ಹೆಂಡತಿ ನಿಜವೇ ಅದರೂ 
ನನ್ನಲ್ಲೂ ಇದೆ ಒಂದು ಹೆಂಗರಳು 
ಅದು ಬಯಸುವುದು ಸದಾ ನಿನ್ನ ಒಲವು 

ಮಾಂಗಲ್ಯ ಬಂಧನವಾಗಿ ವರುಷಗಳೇ ಕಳೆದರೂ 
ನಾ ನಿನ್ನೊಂದಿಗೆ ಕಳೆದದ್ದು ಕೇವಲ ಕೆಲ ದಿನಗಳು 

ಪ್ರತೀಕ್ಷಣ ಹೊಟ್ಟೆಕಿಚ್ಚು ಪಡುತಿರುವೆ ಕಾರಣ 
ಪತ್ನಿಗಿಂತ ಹೆಚ್ಚು ಪ್ರೀತಿಸುವೆ ನೀ ವೃತ್ತಿಯನ್ನು 
ಒಮ್ಮೆಯಾದರೂ ನೆನೆಸಿಕೋ ನಿನ್ನಾಕೆಯ 
ಉಸಿರು ಬಿಗಿಹಿಡಿದು ಕಾಯುತಿರುವಳು ನೀ ಬರುವ ದಾರಿಯ 

ಸಮುದ್ರದಲ್ಲಿ ಮುಳುಗುವೆಯೋ ಮರುಭೂಮಿಯಲ್ಲಿರುವೆಯೋ 
ಹಿಮ ಪರ್ವತಗಳಲ್ಲಿ ಸಿಲುಕಿರುವೆಯೋ ನಾನರಿಯೆ
ನೀ ಹೇಗಿದ್ದರೂ ಎಲ್ಲಿದ್ದರೂ ಮರೆಯದಿರು ನಿನ್ನ ಹುಡುಗಿಯ 
ನಾ ಸದಾ ನಿನ್ನ ಕ್ಷೇಮಕ್ಕಾಗಿ ಜಪಿಸುವೆ 

ನೀ ಸದಾ ಕಾಎಂದಿಗೂ ಭಾರತ ಮಾತೆಯ ಮಕ್ಕಳನು 
ಎಂದಿಗೂ ಚಿಂತಿಸದಿರು ನಾ ಇಲ್ಲಿ ಒಂಟಿಯಾಗಿರುವೆನೆಂದು 
ನಾ ಹೊಟ್ಟೆಕಿಚ್ಚು ಪಡುವೆನೆಂದು ವ್ಯಥೆ ಪಡಬೇಡ 
ಆದರೂ ಎಂದಿಗೂ ದೂರಾಗದು ನನ್ನ ಮನದ ದುಗುಡ 

ಮನದ ಮನದನ್ನೆಯ ಮರೆತರೂ ಚಿಂತೆಯಿಲ್ಲ 
ತಾಯ್ನಾಡಿನ ರಕ್ಷಣೆ ನಿನ್ನ ಹೊಣೆಯೆಂದು ನೀ ಮರೆಯುವುದಿಲ್ಲ 
ನನಗೆ ಹೊಟ್ಟೆಕಿಚ್ಚಿಗಿಂತ ಹೆಚ್ಚಾಗಿ ನನ್ನ ದೇಶವನ್ನು 
ಹುಚ್ಚಿಯಂತೆ ಪ್ರೀತಿಸುವೆ ಜೊತೆಗೆ ನಿನ್ನನ್ನೂ ಕೂಡ 

ಸಂಭ್ರಮದಿಂದ ಬರುತಿದೆ ಮತ್ತೊಂದು ಸಂಕ್ರಾಂತಿ 
ತುಂಬಲಿ ಎಲ್ಲರ ಬಾಳಲ್ಲಿ ಹೊಸ ಕಾಂತಿ 
ಎಳ್ಳು ಬೆಲ್ಲದ ಸಂಗಮದಂತೆ ಚಿಮ್ಮಲಿ ಹೊಸ ಪ್ರೀತಿ 
ನಾವು ಸಿಹಿಯ ತಿಂದು ಮತ್ತೊಬ್ಬರಿಗೂ ತಿನ್ನಿಸಿ 
ಮರೆಯೋಣ ಹಿಂದಿನ ಕಹಿಯ 
ಸಾಗೋಣ ಎಲ್ಲರೂ ಸವಿಯುತ ಹೊಸ ಬದುಕಿನ ಸವಿಯ 

ನಾ ಮಣ್ಣಲ್ಲಿ ಮಣ್ಣಾಗುವ ಮುನ್ನ 
ತಿಳಿಯಬಾರದೇ ನೀ ನನ್ನ ಪ್ರೀತಿಯ ಆಳವನ್ನ 
ನನ್ನ ಉಸಿರಲ್ಲಿ ಉಸಿರಾಗಿರುವ ನೀನು 
ತಡೆಯಬಾರದೇ ನನ್ನ ಸಾವನ್ನು 
ಬಯಸಿದ ಪ್ರೀತಿಗೆ ಬೇಡವಾಗಿರುವೆ ನಾ ಇಂದು 
ತಿರುಗಿ  ಬರಲಾರೆ ನಾ ಮುಂದೆಂದೂ 
ಈ ಉಸಿರು ನಿಲ್ಲುವ ಮುನ್ನ 
ಕೇಳಬಯಸುತಿದೆ ನಿನ್ನ ಒಲವಿನ ಹಾಡನ್ನ 
ಎಲ್ಲಿದ್ದರೂ ಓಡಿ ಬಾ ನನ್ನಲ್ಲಿ 
ಕಾಯುತಿರುವೆ ಜೀವ ಬಿಡಲು ನಿನ್ನ ಮಡಿಲಲ್ಲಿ 

ಮುಂಜಾನೆ ಬೀಸಿದ ತಂಪಾದ ಗಾಳಿಗೆ ಇಳೆಯೆಲ್ಲ ಛಳಿ ಛಳಿ 
ಮನಸಿಗೆ ಬರುವ ಆಲೋಚನೆಗಳೆಲ್ಲ ಸಿಹಿ ಸಿಹಿ 
ಭುವಿಯಲಿ ಬೀಸುತಿರುವ ತಂಪಾದ ಗಾಳಿಯು 
ಎಲ್ಲರ ಮನಸಿಗೂ ಬೀಸಲಿ ತಾನು ನಕ್ಕು ಪರರನ್ನು ನಗಿಸಲಿ 
ಕೋಪ ತಾಪ ನೋವು ದುಃಖಗಳನು ಬಿಸಿಲಿಗೆ ಬೇಯಲು ಬಿಟ್ಟು 
ಸ್ನೇಹ ಪ್ರೀತಿ ಸಂತೋಷ ವಿಶ್ವಾಸವೆಂಬ ತಣ್ಣನೆಯ ಆನಂದವ ಕಟ್ಟು 
ಮರೆಯೋಣ ದ್ವೇಷವ ಹರಸೋಣ ಎಲ್ಲರಿಗೂ ಸಂತೋಷವ 

ಸದಾ ಮುಗುಳ್ನಗುವೆ ಎಂದು ನೋವಿಲ್ಲವೆಂದು ಅರ್ಥವಲ್ಲ 
ಮುಖ ಸಪ್ಪಗಿದೆಯೆಂದು ಖುಷಿಯಾಗಿಲ್ಲವೆಂದೂ ಅಲ್ಲ 
ಮುಖವೊಂದು ಪುಸ್ತಕದಂತೆ ಪುಟ ತಿರುವಿದಂತೆಲ್ಲ 
ವಿಷಯ ಬೇರೆಯಾಗುವ ಹಾಗೆ 
ಪ್ರತೀ ಕ್ಷಣ ಕಳೆದಂತೆ ಭಾವನೆಗಳು ವಿಭಿನ್ನ ರೂಪ ತಾಳುವುದು 
ಆ ಭಾವಗಳ ಅನುಸಾರ ಮುಖ ಕಂಡರೆ 
ಆ ಮುಖದ ಮೇಲೆ ನೋವು ನಲಿವುಗಳ ಸಂಗಮವಾಗುವುದು 

ದೇಶವೆಲ್ಲ ಕಂಬನಿ ಮಿಡಿಯುತ್ತಿದೆ ವೀರ ಮರಣ ಅಪ್ಪಿದ ಯೋಧನಿಗೆ 
ಏನು ಬರೆದರೂ ಹೊಗಳಿದರೂ ಸಾಲದು ನಿಮ್ಮ ತ್ಯಾಗದ ಬದುಕಿಗೆ 
ನಿಮ್ಮ ಅಭಯ ಹಸ್ತಗಳಲ್ಲಿ  ನಿರ್ಭಯವಾಗಿ ಬದುಕುವ ನಾವೇ ಧನ್ಯರು 
ನಿಮ್ಮ ದೇಹ ಮಣ್ಣಿಗೆ ಸೇರಿದರೂ ನಿಮ್ಮ ತ್ಯಾಗದ ಫಲ ಅಜರಾಮರ