ವಿಶ್ವ ಕವನ ದಿನವಂತೆ ಇಂದು 
ಅದಕೆ ಏನೋ ನನ್ನ ಪದಗಳೆಲ್ಲ ಹಿಂದು ಮುಂದು 
ಪದಕಟ್ಟಿ ಕವನ  ಬರೆಯಲೇಬೇಕು 
ಇವತ್ತಿನ ದಿನಕ್ಕೆ ಅರ್ಪಿಸಲೇ ಬೇಕು 
ಆದರೇನು ಮಾಡಲಿ ಹಿಂದು ಮುಂದಾಗಿರುವ 
ಪದಗಳನು ಜೋಡಿಸಿ ಸುಂದರ ಕವಿತೆಯ ಪೋಣಿಸಿ 
ಕವನದ ದಿನಕ್ಕೆ ಕವನವನ್ನೇ ಬಯಸುವ 
ಚಂದನದ ಕವಿತೆಗೆ ಯಾಕೀ ತಲ್ಲಣ...???? 

ನಿದ್ದೆಯ ಮಂಪರಲ್ಲಿದ್ದೆ ಎಲ್ಲಿ ಗುನುಗುತ್ತಿತ್ತೋ ನಿನ್ನ ನಿನಾದ 
ಥಟ್ಟನೆ ನೆಟ್ಟಗಾದವು ಕಿವಿಗಳೆರಡು ದೂರ ಓಡಿದಳು ನಿದ್ರಾದೇವಿಯು 
ಏನು ಶಕ್ತಿಯೋ ನಿನ್ನ ದನಿಯಲ್ಲಿ ಎದ್ದು ಸವಿದೆ ಸುಂದರ ಪ್ರಕೃತಿಯನಿಲ್ಲಿ 
ಮನದ ಭಾರವೆಲ್ಲ ಕ್ಷಣದಲ್ಲಿ ಕರಗಿತು 
ಹೊಸ ಭರವಸೆಯೊಂದು ಮನದಲ್ಲಿ ಮೂಡಿತು 
ನೋವು ದುಃಖವೆಲ್ಲ ಮರೆತೆ ನವದಿನದ ಪ್ರಾರಂಭ ಅರಿತೆ 
ನೋವು ಮರೆಸಿ ಮಂದಹಾಸ ಮೂಡಿಸಿದ ಕೋಗಿಲೆಗೆ 
ಮನದುಂಬಿ ಅರ್ಪಿಸುವೆ ನಮನ ಅದಕ್ಕೆಂದೇ ಬರೆದೆ ಈ ಕವನ 

ದೇವರು ಕೊಟ್ಟ ಸುಂದರ ಉಡುಗೊರೆ ಪ್ರೀತಿ 
ಅದನು ನಾವು ನೋಡುವ ಪರಿ ನಾನಾ ರೀತಿ 
ಬಯಸುವರಿಗೆಲ್ಲ ಸಿಗದ ವರವಾಗಿ ಭಾಸವಾದರೆ 
ಬೇಡವೆಂದರೂ ಕೆಲವೊಮ್ಮೆ ಬಂದು ಸುರಿವುದು 
ಬೇಕೆಂದು ಕಾಯುವಾಗ ದೂರ ಓಡುವುದು 
ಪ್ರೀತಿಸುವುದು ಪ್ರತೀ ಜೀವಿಯ ಹಕ್ಕಾದರೆ 
ದಕ್ಕಲೇ ಬೇಕು ಎನ್ನುವ ಹಠ ಸ್ವಾರ್ಥವೆನಿಸುವುದು 
ಪ್ರೀತಿಯನ್ನು  ಪ್ರೀತಿಯಿಂದ ಪ್ರೀತಿಸಿ 
ಬಲವಂತವಾಗಿ ದಕ್ಕಿಸಿ ಅನುಭವಿಸದಿರಿ 
ಮೊಗ್ಗು ತಾನಾಗಿಯೇ ಅರಳಿ ಹೂವಾಗಬೇಕು 
ದಳವನ್ನು ನೋಯಿಸಿ ಅರಳಿಸಿದರೆ ಸಿಗುವುದು 
ಬಾಡಿ ಬೆಂಡಾದ ಹೂವೆ ಹೊರತು ಸುಂದರ ಪುಷ್ಪವಲ್ಲ 
ಪ್ರೀತಿಯೂ ಹಾಗೆ...... 

ನಿನ್ನಲ್ಲಿ ಅಡಗಿದ ನೋವನು ನೀನೆ ಹುಡುಕಿ ಕೊಲ್ಲು 
ಪರರಿಂದ ಸಾಂತ್ವನ ಬಯಸಿದರೆ 
ಈ ಬಾಳು ಮುಗಿಯದ  ಗೋಳು 
ಮನಸಲ್ಲಿ ನೋವಿರಬಹುದೇನೋ ನೂರಾರು 
ಮಾಡುವ ಸಾಧನೆಗಳು ಕಾಯುತಿವೆ ಸಾವಿರಾರು 
ಬಯಸದೇ ಬಂದಿರುವರೇ ಎಲ್ಲರೂ ಈ ಭೂಮಿಯ ಮೇಲೆ 
ಹೊತ್ತು ಒಂದೊಂದು ವಿಶೇಷ ಕಲೆ 
ಕಾಯಲೇ ಬೇಕು ತಿರುಗಿ ಹೋಗುವ ಕಾಲವನ್ನು 
ತುಂಬಲೇಬೇಕು ಸಾರ್ಥಕ ಬದುಕಿನಿಂದ 
ಹೋಗಿ ಬರುವ ನಡುವಿನ ಅಂತರವನ್ನು 

ನಿನಗೊಂದು ಉಡುಗೊರೆಯ ಕೊಡುವಾಸೆ 
ಆದರೆ ಏನು ಕೊಡಲಿ ನಾ ನಿನಗೆ 
ಸಾಟಿ ಏನು ನೀ ಸುರಿಸುವ ಒಲವಿಗೆ 
ಯೋಚಿಸಿ ಯೋಚಿಸಿ ದಣಿದಿದೆ ಈ ಮನವು 
ತೋಚದೇ ಬರೆಯಲು ಯಾವುದೇ ಪದವು 
ಏನೆಂದು  ವರ್ಣಿಸಲಿ ಏನನ್ನು ಕೊಡಲಿ 
ಹುಡುಕಿತಿರುವೆ ಆ ಉಡುಗೊರೆಯ ಪ್ರತೀಕ್ಷಣ 
ಹೋಗಲಾಡಿಸಲು ಈ ಮನದ ತಲ್ಲಣ 

ಜನ್ಮ ನೀಡುವ ಜೀವನದಿ  
ಪ್ರೀತಿಯ ರೂಪ ಸಹನೆಯ ದೀಪ 
ಮಮತೆಯ ಸಾಗರ ತ್ಯಾಗದ ಬಿಂಬ 
ಮನಸಲ್ಲಿ ಶಾಂತಿಯ ಮೊಗದಲ್ಲಿ ಹೂನಗೆಯ ತುಂಬುತ 
ನೋವು ನಲಿವುಗಳನು ಸಮನಾಗಿ ನುಂಗುತ 
ಸಂತೋಷ ಕೊಟ್ಟು ಮನವನ್ನು ಗೆದ್ದು 
ಕೋಪ ತಾಪಗಳ ಸಂಹಾರ ಮಾಡಿ 
ಒಲವ ಸುರಿವ ದೇವತೆಯಂತೆ ಬಾಳುವಳು 

ಹೂವು ಹಣ್ಣಾಗುವುದು ಆದರೆ ಹಣ್ಣು ಹೂವಾಗಲಾರದು 
ಅಂತೆಯೇ ಸ್ನೇಹ ಪ್ರೀತಿಯಾಗಬಹುದು ಆದರೆ 
ಪ್ರೀತಿ ಎಂದಿಗೂ ಸ್ನೇಹವಾಗುವುದಿಲ್ಲ 
ಪ್ರಕೃತಿಯಂತೆ ನಮ್ಮ ಜೀವನ ನಡೆವುದೇ ಹೊರತು 
ನಮ್ಮಂತೆ ಪ್ರಕೃತಿಯ ಬದಲಿಸಲಾಗದು 

ನಿನ್ನ ಭೂತಕಾಲವ ಸ್ವೀಕರಿಸಿ 
ವಾಸ್ತವದಲ್ಲಿ ಸಹಕರಿಸಿ 
ಭವಿಷ್ಯವನ್ನು ಪ್ರೋತ್ಸಾಹಿಸುವುದೇ 
ಸತ್ಯ ಸಂಬಂಧ 

ಯಾವುದೇ ನೋವಿಗೂ ಪ್ರೀತಿ ಸ್ನೇಹಗಳು 
ಮಾತ್ರೆಯಾಗಬಹುದೇನೋ 
ಆದರೆ ನೆನಪಿಡಿ ಪ್ರೀತಿ ಸ್ನೇಹದಿಂದ 
ಆದ ನೋವಿಗೆ ಔಷಧಿಯೇ ಇಲ್ಲ