Tuesday, 23 June 2015

ನಲಿವೊಂದೆ ನೆನೆದರೆ ನೋವನ್ನು ನುಂಗುವರ್ಯಾರು 
ಮನಸಿನ ನೋವನ್ನು ಮರೆತರೆ ಬದುಕಲ್ಲಿ 
ಮುಂಬರುವುದನ್ನು ತಡೆಯುವರ್ಯಾರು 
ಬದುಕೊಂದು ನೋವು ನಲಿವುಗಳೆಂಬ ಚಕ್ರಗಳ ಬಂಡಿ 
ಸರಿಯಾಗಿ ಸುತ್ತಿದರೆ ನಮ್ಮ ಬಾಳೊಂದು ಸುಂದರ ಕನ್ನಡಿ 

Sunday, 21 June 2015

ನಿನ್ನೊಂದಿಗೆ ಮಳೆಯಲಿ ನೆನೆದ ಆ ಕ್ಷಣ 
ನಾ ಕಂಡೆ ನಿನ್ನ ಕಣ್ಣಲ್ಲಿ ಹನಿಯಾಗಿ ಮೂಡಿದ ಮಿಂಚೊಂದ 
ಅದು ಹೇಳುತಿತ್ತು ನನಗೆ ನಿನ್ನ ಪ್ರೀತಿಯ ಆಲಿಂಗನ 
ಕಣ್ಣಲ್ಲೇ ಹುಟ್ಟಿ ಕಣ್ಣಿಂದಲೇ ಕಳಿಸಿದ ನಿನ್ನ ನಯನ ಸಂದೇಶಕ್ಕೆ 
ಏನೆಂದು ಉತ್ತರಿಸುವುದೋ ತಿಳಿಯದಾಗಿದೆ 

Monday, 15 June 2015

ನೀ ನುಡಿಯದ ಪದಗಳಿಗೆ ಸ್ವರವೂ ನಾನೇ 
ನೀ ಹೇಳದ ನೋವಿಗೆ ಕಂಬನಿಯೂ ನಾನೇ 
ನೀ ಹಾಡುವ ಹಾಡಿಗೆ ಉಲಿಯುವ ನಾದಗಂಗೆಯೂ ನಾನೇ 
ನೀ ಸುರಿಸುವ ಒಲವಿಗೆ ಹರಿಯುವ ಪ್ರೆಮಗಂಗೆಯೂ ನಾನೇ 
ನಿನಗೇ ನೋವೇ ಆದರೂ ಸಾವೇ ಬಂದರೂ 
ನಿನ್ನ ಉಸಿರಲ್ಲಿ ಉಸಿರಾಗಿ ಸಾವಲ್ಲಿ ಸಾವಾಗಿ ಬರುವ ಜೀವವೂ ನನ್ನದೇ 

Wednesday, 10 June 2015

ನನ್ನ ಹೃದಯದಲ್ಲಿ ಒಲವಿನ ಕಾರ್ಮೋಡ ಕವಿದಾಗಿದೆ 
ನಿನ್ನ ಪ್ರೇಮದ ಕಿರಣಗಳ ಸ್ಪರ್ಶದಿಂದ ಅದು 
ಕರಗಿ ಪ್ರೀತಿಯ ಮಳೆ ಸುರಿಸಬೇಕಿದೆ 
ಹನಿಯಾಗಿ ಉದುರುವುದೋ ಭೋರ್ಗರೆದು 
ಸುರಿಯುವುದೋ ಗೊತ್ತಿಲ್ಲ 
ಮುಂಜಾವಿನಲ್ಲಿ ಎಲೆಗಳ ಮೇಲೆ ಬಿದ್ದ ಇಬ್ಬನಿಯಷ್ಟೇ 
ಪುಟ್ಟ ಕಿರಣ ತಾಕಿದರೂ ಸಾಕು 
ಪ್ರೀತಿಯ ಪರ್ವತವೇ ಸಿಕ್ಕಿತೆಂದು ಕುಣಿದಾಡುವುದು 
ನನ್ನ ಮನವೆಲ್ಲ 

Tuesday, 9 June 2015

ಬರೆಯದೇ ಉಳಿದ ಪದಗಳಿಲ್ಲ ನಿನ್ನ ಭಾವಗಳ ಬಿಂಬಿಸಲು 
ಹುಡುಕದಿರುವ ಹಾಳೆಗಳಿಲ್ಲ ನನ್ನ ಕವನಗಳ ತುಂಬಿಸಲು 
ನಿನ್ನ ಭಾವನೆಗಳಿಗೆ ನನ್ನ ಪದಗಳ ಮಿಲನವಾದ ಕ್ಷಣ 
ಚಂದಿರ ಕಂಡ ನೈದಿಲೆಯಂತೆ ನಲಿಯುವುದು ನನ್ನ ಮನ 

Sunday, 7 June 2015

ಇನ್ನೇನು ನೋವೆಲ್ಲಾ ದೂರ ಹೋದವೆಂದು ನಗುವ ಮುನ್ನವೇ 
ಕಹಿ ನೆನಪೆಂಬ ಮುಳ್ಳುಗಳು ಮನಸಿಗೆ ಇರಿದು ಕಣ್ಣೀರ ಹರಿಸುವುವು 
ಆ ನೆನಪುಗಳನು ಮರೆಯುವ ಯತ್ನದಲ್ಲಿ ಹೊಸ ಆಸೆಗಳ 
ಚಿಗುರನ್ನೇ ಕತ್ತರಿಸಿ ಹಾಕುತ ಬದುಕುತಿವೆ  ಭಾವನೆಗಳು 

Tuesday, 2 June 2015

ಬಾರದ ಭಾವನೆಗಳ ಬರಿಸುವ ಹುಚ್ಚು ಹಠವೇಕೆ 
ಒಲ್ಲದ ಪ್ರೀತಿಯ ಒಪ್ಪಿಕೋ ಎನ್ನುವ ಬಲವಂತವೇಕೆ 
ಮರುಭೂಮಿಯ ಮರಳಲ್ಲಿ ಮಲ್ಲಿಗೆಯ ಬೆಳೆದರೆ 
ಸತ್ತು ಹೋದ ಮನದಲ್ಲಿ ಪ್ರೇಮದ ಭಾವವ ಬಿತ್ತಿದಂತೆ