ಪ್ರೀತಿಸುವ ಮನಕೆ ಕಾಯುವುದೇ ಕಾಯಕ 
ಕಾಯಿಸುವ ಮನಸಿಗೆ ಆ ಮನಸ ಸೇರುವ ತವಕ 
ರಾಗಕ್ಕೆ ಭಾವವು ಸೇರಿ ಇಂಪಾದ ಸಂಗೀತ ಹರಿವಂತೆ 
ಕಾಯಕಕ್ಕೆ ತವಕ ಸೇರಿದರೆ ಅಂತ್ಯವಾಗುವುದು ವಿರಹ 
ಚಿಲುಮೆಯಂತೆ ಚಿಮ್ಮುವುದು ಪ್ರೇಮ ಬರಹ 

ಪುಸ್ತಕ ವೈಜ್ಞ್ಯಾನಿಕವೋ, ಸಾಮಾಜಿಕವೋ, ಹಾಸ್ಯವೋ, 
ಮನರನಜನೆಯೋ ಮತ್ತೊಂದೋ ಮೊಗದಂದೋ 
ಓದುಗರ ಆಯ್ಕೆ ಯಾವುದೇ ಇರಲಿ ಜ್ಞ್ಯಾನಕ್ಕೆ ಅಂತ್ಯ ಇರದು 
ಪುಸ್ತಕದ ಪುಟಗಳಂತೆ ಮನಸಿನ ಭಾವಗಳು ಬದಲಾಗುವುವು 
ಆ ಭಾವಗಳೆಲ್ಲ ಪುಟಗಳ ಸಾರದಂತೆ ಅನುಭವಿಸಿ ಓದಿದರೆ ಆನಂದ 
ಒತ್ತಾಯದಿಂದ ಓದಿದರೆ ಆಗುವುದು ಸಮಯದ ದಂಡ 
ಪ್ರೀತಿಯಿಂದ ಓದಿದರೆ ಪುಸ್ತಕ ಆಗುವೆ ಜ್ಞ್ಯಾನದ ಅರ್ಚಕ 

ನಿನ್ನ ನಗುವೆಂಬ ಬೆಳದಿಂಗಳಲಿ ಹರಿದಾಡುವ ಒಲವು 
ನನ್ನ ಕಣ್ಣಿನ ಕಾಂತಿಯ ಸೇರಿದರೆ ಚಿಮ್ಮುವುದು ಕಾರಂಜಿಯು 
ನಿನ್ನ ತುಟಿಯಂಚಲ್ಲಿ ಒಂದು ಕಿರುನಗೆಯ 
ನಾ ಕಂಡರೆ ಸಾಕು ನನ್ನ ಮನಸು ನಲಿಯುವುದು
ಅರಳುತಿರುವ ಹೂವಲ್ಲಿ ಹರಿಯುತಿರುವ ನೀರಲ್ಲಿ 
ನಾ ಕಾಣಲು ಪರಿತಪಿಸುವೆ ಆ ನಿನ್ನ ನಗುವ 
ಇರುಳ ಚಂದ್ರನಲ್ಲೂ  ಕಾಣುತಿದೆ ನಿನ್ನ ಮೊಗವು 
ಆ ಚಂದ್ರನಿಗೂ ಸಾಟಿಯಾಗುತ್ತಿಲ್ಲ ನಿನ್ನ ನಗುವು
ನಾನಿರುವ ಪ್ರತೀಕ್ಷಣ ಬಯಸುವೆ ನಿನ್ನ ಆ ನಗುವ 
ಮರೆಯುವೆ ಅದ ನೋಡುತ ನನ್ನ ಮನದ ಭಾರವ 

ಬಂದೇ ಬಿಟ್ಟಿತು ಮತ್ತೊಂದು ಮಂಗಳವಾರ 
ಹೊತ್ತು ಹತ್ತಾರು ಕಾದಂಬರಿಗಳ ಹಾರ 
ಬೇಕಾದ ಕಾದಂಬರಿ ಎಂಬ ಹೂ ಆರಿಸಿ ನೀವೆಲ್ಲ 
ಅದನು ಕಿತ್ತು ನಿಮ್ಮ ಕೈಯಲ್ಲಿಡುವರು 
ಕಾದಂಬರಿ ಕೂಟದ ಮಾಲೀಕರೆಲ್ಲ 
ಹಾರವೆಲ್ಲ ಬಿಡಿ ಬಿಡಿ ಹೂಗಳಾದ ಮೇಲೆ 
ಒಂದೊಂದೇ ದಳವನ್ನು ಸವಿಯಿರಿ ನೀವೆಲ್ಲ 
ಅರ್ಪಿಸುತ್ತಾ ಧನ್ಯವಾದಗಳನು ಕಾದಂಬರಿಗಳಿಗೆಲ್ಲ 

ಕೈಗೆಟುಕಿದರೆ ಒಂದು ಕಾದಂಬರಿ 
ಪುಟ ತಿರುವಿದರೆ ತೋರುವುದು ನೂರಾರು ಭಾವ ಲಹರಿ 
ಬಿಳಿಯ ಹಾಳೆಗಳಿಗೆ  ಕಪ್ಪು ಶಾಹಿಯ ಬಂಧನ 
ಓದುತ ಹೋದಂತೆ ಮನಸಿಗಾಗುವುದು ರೋಮಾಂಚನ 
ಹಾಳೆ ಬಿಳಿಯಾದರೂ ಶಾಹಿ ಕಪ್ಪಾದರೂ 
ಅದರಲ್ಲಿ ಅಡಗಿವೆ ರಂಗು ರಂಗಿನ ಭಾವನೆಗಳು 
ಅದನೋದುವ ಭಾಗ್ಯವ ಪಡೆದ ನನ್ನ ನಯನ 
ಹೇಳುತಿವೆ ಪುಸ್ತಕಗಳಿಗೆ ಮನದುಂಬಿ ನಮನ 

ನೀ ನಡೆವ ದಾರಿಯಲ್ಲಿ ಹೂನಗೆಯು ಸದಾ ಅರಳಿರಲಿ 
ನೀ ನುಡಿವ ಸ್ವರದಲ್ಲಿ ಸಂಗೀತವು ತುಂಬಿ ಹರಿಯಲಿ 
ಏನೇನೋ ಬಯಸುವ ಮನಸು
ಆಸೆಗಳೆಲ್ಲ ಕೈಗೂಡಿದರೆ ಎಂತಹ ಸೊಗಸು 

ವಿಧಿಯಾಟದ ಬುಟ್ಟಿಯಲ್ಲಿ ಸಿಹಿಯನ್ನು ಹೆಕ್ಕಿ 
ಕಹಿಯನ್ನು ಕುಟ್ಟುವ ಸೌಭಾಗ್ಯ ನನಗಿಲ್ಲ 
ಆಗಿದ್ದು ಆಗಲಿ ಸಿಕಿದ್ದು ಸಿಗಲಿ ನನಗಿಲ್ಲ ರೋದನೆ 
ನೀ ಸನಿಹವಿಲ್ಲ ಎಂಬುದೊಂದೇ ನನ್ನ ವೇದನೆ 

ನಿನ್ನ ಕಣ್ಣ ನೋಟದಲ್ಲಿ ಸದಾ ನನ್ನ ಬಿಂಬ ಕಾಣುತಿರಲಿ 
ನನ್ನ ಬಾಳಿನ ಕೊನೆವರೆಗೂ ನಿನ್ನ ನೆನಪು ಕಾಡುತಿರಲಿ 
ಅಲ್ಲಿಯವರೆಗೂ ನಾ ಬರೆಯುತಿರುವೆ ಒಲವಿನ ಕವನ 
ಅದು ನಿನ್ನ ಮನ ತಟ್ಟಿದರೆ ನನ್ನ ಬದುಕು ಪಾವನ 

ನಾನು ಓದಿದ ಕಾದಂಬರಿಗಳ ಹೆಸರಲ್ಲಿ ಹೆಣೆದಿರುವ ಸಾಲುಗಳು 
#ಕನ್ನಡ_ಕಾದಂಬರಿಗಳ_ಕೂಟ 
"ಡಾಲರ್ ಸೊಸೆಯ" ಕಾಲದಲ್ಲಿ 
"ಚೋಮನ ದುಡಿಯ" ಸೊಬಗನ್ನೇ ಮರೆತು 
"ಯಶಸ್ವಿ"ಯಾಗಿ "ಚಂದ್ರನ ಚೂರ"ನ್ನು ಓದಿದರೂ 
"ಸಿಂಗಾರೆವ್ವ" ನ ಸೌಂದರ್ಯವನ್ನು "ಧರ್ಮರಾಯನ ಸಂಸಾರ"ದಲ್ಲಿ 
ಹುಡುಕುವ ಆಸೆಯೇ "ಚಿಗುರಿದ ಕನಸು"