ಹೂವು

ಹೂವೇ ನಿನ್ನ ಬದುಕೇ ಸುಂದರ 

ಬೆಳಗಿನ ಜಾವ ಮಂಜಿನ ಹನಿಗಳಿಂದ 

ಸುಂದರವಾಗಿ ಕಾಣುವೆ 

ನಗುವಿರದ ಮುಖವು ನಿನ್ನ 

ನೋಡಿದರೆ ಸಾಕು ಕ್ಷಣಮಾತ್ರದಲ್ಲೇ 

ನಗು ಅರಳುವುದು ಮೊಗದಲ್ಲಿ 

ಹೆಣ್ಣಿನ ಮುಡಿಗೆ ಚಂದ ನೀನು  

ಪ್ರೀತಿಯ ಭಾವಕ್ಕೆ ಬಣ್ಣ ನೀನು  

ಕವಿಗಳ ಕವಿತೆಗೆ ಸ್ಪೂರ್ತಿ ನೀನು 

ದೇವರ ಶಿರಕ್ಕೂ ಮುಡಿಸುವರು ನಿನ್ನನ್ನೇ  

ಚರಣ ಕಮಲಕ್ಕೂ ಇಡುವರು ನಿನ್ನನ್ನೇ  

ಎಂತಹ ಪುಣ್ಯ ಜೀವ ನಿನ್ನದು ಹೂವೆ 

ಬೆಳಗ್ಗೆ ಉದಯಿಸಿ ಸಂಜೆ 

ಮುಳುಗುವ ನಿನ್ನ ಬದುಕು ಎಷ್ಟು 

ಸುಂದರವೋ ಅಷ್ಟೇ ಸಾರ್ಥಕ

ಪ್ರೀತಿ ಮತ್ತು ವಿರಹ

ನಿನ್ನ ಸನಿಹವೆಷ್ಟು ಸುಂದರ  ಗೆಳೆಯ 

ನೀ ನಗಲು ಹೂವು ಕಂಡಂತೆ  

ನೀ ನುಡಿಯಲು ಮಧುರ ಸಂಗೀತದಂತೆ 

ಬಳಿ ನೀ ಬರಲು ಮಿಂಚು ಹರಿದಂತೆ 

ನನ್ನ ಸೆಳೆಯಿತು ನಿನ್ನ ಕಣ್ಣೋಟ 

ನಿನ್ನಲ್ಲಿ ಬೆರೆಯಿತು ನನ್ನ ಉಸಿರಾಟ 

ನೀ ಸುರಿಸುವ ಒಲವಿನ ಮಳೆಗೆ 

ಪ್ರೀತಿಯಾಗಿದೆ ನನ್ನ ಹೃದಯದ ಇಳೆಗೆ  

ನಿನ್ನ ಸ್ನೇಹದ ಪರಿಯೇನು ಪ್ರೀತಿಯ ಭಾವವೇನು 

ನನ್ನ ಬಾಳಲ್ಲಿ ತಂಗಾಳಿ ಬೀಸುತಿರುವೆ  

ಕನಸಲಿ ಬಂದು ಕಾಡುತಿರುವೆ 

ಮನಸಿನ ಆಸೆಯ ಕಲಕುತಿರುವೆ 

ನಿನ್ನಲ್ಲಿ ಕಳೆದ ಸುಮಧುರ ಕ್ಷಣಗಳ 

ಮತ್ತೆ ಮತ್ತೆ ನೆನೆಯುವ ಆಸೆ ನನ್ನದು 

ಸ್ವಪ್ನದಲ್ಲಿ ಕಂಡ ನಿನ್ನ ಮಡಿಲಲ್ಲಿ 

ಮತ್ತೆ ಮತ್ತೆ ಮಲಗುವಾಸೆ ನನ್ನದು 

ನನ್ನಿಂದ ದೂರಗದಿರು ಗೆಳೆಯ  

ನಾ ಕಳೆದುಕೊಲ್ಲಲಾರೆ ನಿನ್ನ ಸನಿಹ

ಬೀಸುವ ಗಾಳಿಯಂತೆ ನೀ ಓಡಬೇಡ 

ವಿರಹದಲ್ಲಿ ನನ್ನ ಬೇಯಿಸಿ ಕೊಲ್ಲಬೇಡ  

ಒಲವಿನ ವ್ಯಥೆ

ಮನದ ಪ್ರೀತಿಯ ಗಮನಿಸದೆ 

ಮುಖದ ಮೇಲಿನ ಪ್ರೀತಿಗೆ ಮುಗಿಬಿದ್ದೆ  ನೀನು 

ಮನದಲ್ಲಿ ಅಡಗಿದ್ದ ಆಳ 

ಭಾವನೆಯನ್ನು ಅರಿಯದೆ 

ಮುಖದಲ್ಲಿರದ ಮಂದ 

ಭಾವವನ್ನು ಹುಡುಕುತಿರುವೆ

ಕಾದಿದ್ದೆ ನನ್ನ ಹೃದಯದಲ್ಲಿ ನಿನ್ನ ತುಂಬಿಕೊಳ್ಳಲು 

ಹೊರಟೋದೇ ಏಕೆ ನನ್ನ ತೊರೆದು ನೀನು 

ಕಾಣದ ಪ್ರೀತಿಯ ಹುಡುಕದಿರು 

ಕಾಣುವ ಪ್ರೀತಿಯ ತೊರೆಯದಿರು 

ಸಿಕ್ಕ ಪ್ರೀತಿಯ ಬಿಟ್ಟು ಸಿಗದ ಪ್ರೀತಿಯ 

ಹುಡುಕುತ್ತ ಕೊರಗದಿರು 

ಒಲವ ಸುಧೆಯ ಹರಿಸುತಿರುವೆ ನಿನಗಾಗಿ ನಾನು 

ಕಣ್ಣೀರ ಸಾಗರದಲಿ ಮುಳುಗಿಸದಿರು ನನ್ನ ನೀನು 

ನಗುವಿನ ಮಾಯೆ

ನಿನ್ನ ನಗುವೇ ಎಷ್ಟು  ಸುಂದರ 

ಮನಸನ್ನೆ ನೋಯಿಸಿದರು ನೀ ನಗುವೇ 

ಪ್ರೀತಿಯ ಮಳೆ ಸುರಿಸಿದರು ನೀ ನಗುವೇ 

ಏನಿದು ನಿನ್ನ ನಗುವಿನ ಮಾಯೆ..???? 

ನಿನ್ನ ತುಟಿಯಂಚಲ್ಲಿ ಒಂದು ಕಿರುನಗೆಯ 

ನಾ ಕಂಡರೆ ಸಾಕು ನನ್ನ ಮನಸು ನಲಿಯುವುದು 

ಅದರಲ್ಲಿಯ ನೋವು ಮರೆಮಾಚುವುದು 

ಏನಿದು ನಿನ್ನ ನಗುವಿನ ಮಾಯೆ..???? 

ಅರಳುತಿರುವ ಹೂವಲ್ಲಿ ಹರಿಯುತಿರುವ ನೀರಲ್ಲಿ 

ನಾ ಕಾಣಲು ಪರಿತಪಿಸುವೆ ಆ ನಿನ್ನ ನಗುವ 

ಕನಸಲ್ಲೂ ಕಾಡುತಿದೆ ಆ ಮುದ್ದಾದ ನಗು 

ಏನಿದು ನಿನ್ನ ನಗುವಿನ ಮಾಯೆ...????

ಇರುಳ ಚಂದ್ರನಲ್ಲೂ  ಕಾಣುತಿದೆ ನಿನ್ನ ಮೊಗವು 

ಆ ಚಂದ್ರನಿಗೂ ಸಾಟಿಯಾಗುತ್ತಿಲ್ಲ ನಿನ್ನ ನಗುವು

ನಿನ್ನ ನಗುವಿಗೆ ನಾನೇ ಅಭಿಮಾನಿಯಾಗಿರುವೆ 

ಏನಿದು ನಿನ್ನ ನಗುವಿನ ಮಾಯೆ....????    

ಗೆಳೆಯನ ಅಗಲಿಕೆ

ಮನಸೇಕೋ ಚಡಪಡಿಸುತ್ತಿದೆ ಇನಿಯ 

ನೀನಿಲ್ಲವೆಂದು ನನ್ನ ಸನಿಹ 

ಕಾಣಿಸದೆ ನಿನಗೆ ಈ ಅಗಲಿಕೆಯ ನೋವ 

ತಡೆಯಲಾಗುತ್ತಿಲ್ಲ ನನಗೆ ಈ ಮನಸಿನ ಭಾರ 

ಇನ್ನೆಷ್ಟು ದಿನ ಕಾಯಲಿ ನಿನಗೆ ನಾನು 

ನಿನ್ನನ್ನು ಕನವರಿಸುತ್ತಲೇ ಜೀವನ ಸವಿಸಲೇ ನಾನು 

ಮಾತಿಲ್ಲದೆ ಮೌನವಾದರೆ ನನ್ನ ಕಂಬನಿ ನಿಲ್ಲುವುದೇ 

ಹೀಗೇಕೆ ಕೊಲ್ಲುತಿರುವೆ ನೀ ನನ್ನ 

ಭಾವನೆಗಳ ಲೋಕದಲ್ಲೇ ಬದುಕುತಿರುವೆ ನಾನು 

ನಿನ್ನ ಪ್ರತಿಸ್ಪಂದನವನ್ನು ಕಾಯುತ್ತ 

ಆದರೆ ಈ ನಿನ್ನ ಮೌನವನ್ನು ಹೇಗೆ ಸಹಿಸಲಿ 

ನಿನ್ನ ಹೃದಯಕ್ಕೆ ಅರ್ಥವಾಗುತ್ತಿಲ್ಲವೇ ನನ್ನ ವೇದನೆ 

ಬರಿದಾದ ನನ್ನ ಬಾಳಲೀ ಪ್ರೀತಿಯ ಸುಖವನ್ನು 

ನೀನೇಕೆ ತಂದೆ ಆ ಪ್ರೀತಿಯ ಆನಂದವನ್ನು ಅನುಭವಿಸುವ 

ವೇಳೆಗೆ ನೀನೇಕೆ ಮತ್ತೆ ನನ್ನಿಂದ ದೂರವಾಗುತ್ತಿರುವೆ 

ನನ್ನ ಭಾವನೆಗಳಿಗೆ ನಿನ್ನಲ್ಲಿ ಬೆಲೆಯೇ ಇಲ್ಲವೇ 

ನೀನಿಲ್ಲದ ನನ್ನ ಬಾಳು ಕಲ್ಪನೆಗೂ ಎಟುಕದು 

ಆಗದು ಗೆಳೆಯ ನೀನಿರದೇ  ನಾನು ಬಾಳಲು 

ಈಗಲೇ ನೆನಪಿಸಿಕೊ ನನ್ನ 

ನಾನು ಮಣ್ಣಲ್ಲಿ ಮಣ್ಣಾಗುವ ಮುನ್ನ 

ಪ್ರೇಮದ ಹಾತೊರಿಕೆ

ನೀ ನಡೆವ ಹಾದಿಯ ಹೂವಿಂದ ಅಲಂಕರಿಸಿ 
ನೀ ನುಡಿವ ನುಡಿಯನ್ನು ಮುತ್ತಿಂದ ಪೋಣಿಸಿ 
ನಿನ್ನೊಲುಮೆಯ ಪ್ರೀತಿಗೆ ಭಾವಗಳ ಬಣ್ಣ ತುಂಬಿ 

ನಿನ್ನೊಡಲ ಉಸಿರಾಗಿ ಪ್ರೆಮಗಂಗೆಯನು ಹರಿಸುವೆ

ಕಂಡ ಕನಸನ್ನು ಬೆನ್ನಟ್ಟಿ ಹೋಗುವ ಬದಲು
ಕನ್ನಡಿಯ ಮುಂದೆ ನಿಂತು ಕಲ್ಪನೆಯಲ್ಲೇ ಮೈಮರೆತು
ನಿಂತ ನನ್ನ ಭಾವನೆಗಳಿಗೆ ಜೀವ ತುಂಬಿದೆ ನೀನು
ಮನಸಾರೆ ನಿಷ್ಕಲ್ಮಷವಾಗಿ ಪ್ರೀತಿಸುವೆ ನಿನ್ನ ನಾನು

ನಿನ್ನ ಒಲವ ಸವಿನೆನಪಲ್ಲಿ ಸವಿ ಸ್ವಪ್ನವ ಕಾಣುತ್ತ
ಕವಿತೆಗಳ ಗೀಚುತ್ತ ಪ್ರತಿ ದಿನ ಪ್ರತಿ ಕ್ಷಣ
ಇಂಪಾದ ಪ್ರೇಮ ನಾದವ ಹರಿಸುತಿರುವೆ
ನಿನ್ನ ಎದುರು ನೋಡುತ್ತಾ ಓ ಗೆಳೆಯ....

ಏನು ಉಡುಗೊರೆ ಕೊಡಲಿ ನಾ ನಿನಗೆ....??

ನಿನ್ನಯ ಒಲವಿಗೆ ಉಡುಗೊರೆಯಾಗಿ
ನಾನೇನು ಕೊಡಲಿ ಗೆಳೆಯ
ನನ್ನ ನೋವಿನ ಕಣ್ಣೀರನ್ನು
ನಿನ್ನ ಪ್ರೀತಿಯ ಪನ್ನೀರಲ್ಲಿ ತೇಲಿಸಿದೆ

ಕಲ್ಲಂತೆ ಇದ್ದ ನನ್ನ ಮನಸಲ್ಲಿ
ಭಾವನೆಗಳ ಜೊತೆಯಲ್ಲಿ ಕನಸನ್ನು
ತುಂಬಿ ನಿನ್ನ ಪ್ರೇಮದ ಕಾರಂಜಿಯಲ್ಲಿ
ನನ್ನ ನೆನೆಯುವಂತೆ ಮಾಡಿದೆ

ನಿನ್ನ ಪ್ರೀತಿಯ ಅಪ್ಪುಗೆಯ
ಬಂಧನದಿಂದ ನನ್ನ ಬಂಧಿಸಿ
ನಿನ್ನ ಕರಗಳಿಂದ ನನ್ನ ಕಣ್ಣೀರನ್ನು
ಕರಗಿಸಿ ಪ್ರೀತಿಯ ಮುತ್ತನ್ನು ಹರಿಸಿದೆ

ನಿನ್ನ ಪ್ರೀತಿಯ ಪರಿಯ ಏನೆಂದು
ಬಣ್ಣಿಸಲಿ ನಾನು ಪದಗಳೇ ಸಾಲದಾಗಿದೆ
ನನಗೇನು ತೋಚದೆ ಈ ಕವನವನ್ನೇ
ಉಡುಗೊರೆಯಾಗಿ ನೀಡುತಿರುವೆ

ನೂರಾರು ಬಣ್ಣದ ಕನಸನ್ನು ಒಂದೇ
ಕವಿತೆಯಲಿ ಹೇಳಲು ಸಾದ್ಯವೇ
ನಿನ್ನ ಒಲವಿನ ಧಾರೆಗೆ ಕವಿತೆಯಾಗಿ
ನಾನು ಹರಿದಿರುವೆ ಸ್ವೀಕರಿಸು ಗೆಳೆಯ