ನನ್ನ ಮನದ ಮಾತೆಲ್ಲ ನಿನ್ನ ದನಿಯಲ್ಲೇ ಬೆರೆತು 
ಇಂಪಾದ ಪ್ರೀತಿಯ ನಾದವಾಗಿ ಹರಿಯುತ್ತಿದೆ 
ಸಾಗರದ ಅಲೆಯೂ ಕೂಡ ನಾಚಿ ಹಿಂದೆ ಹೋಗುತಿದೆ 
ನನಗಾಗಿ ಸುರಿಯುತಿರುವ ನಿನ್ನ ಒಲವಿನ ರಭಸಕೆ 
ನಾದಗಂಗೆಯ ನಿನಾದಕೆ ಸೋತಿರುವೆ ನಾ ಇಂದು 
ಪ್ರೇಮಗಂಗೆಯ ಹರಿಸುವೆ ನಿನಗಾಗಿ ಎಂದೆಂದೂ 

ಪ್ರೀತಿ ಬೆರೆತಾಗ ಬದುಕು ಹಸಿರಂತೆ ಕಂಗೊಳಿಸಿದರೆ 
ದ್ವೇಷ ಬಂದಾಗ ಬಾಳು ಕೆಸರಂತೆ ಕೊಳೆಯುವುದು 
ತನ್ನತನವೆಂಬ ಅಹಂ ಬಿಟ್ಟು ಅನ್ಯರ ಅರಿತು ಬೆರೆತರೆ 
ಬಾಳೊಂದು ಭಾವಗೀತೆಯಂತೆ ಭಾಸವಾಗುವುದು 
ಹೃದಯದಲಿ ಕಟ್ಟಬೇಕು ನಂಬಿಕೆಯೆಂಬ ಹರಕೆ 
ಕೊನೆ ಉಸಿರಿರುವರೆಗೂ ಅದೇ ಜೀವನದ ದೊಡ್ಡ ಕಾಣಿಕೆ 

ನೈದಿಲೆಯ ನಗುವು ನೇಸರನ ನಯನವ ಸೇರಿದಾಗ 
ಶಶಿಯ ಕಿರಣಗಳು ಅರಳಿದ ಹೂಗಳ ಚುಂಬಿಸುವಾಗ 
ಕಪ್ಪು ಕಾರ್ಮೋಡ ಕದಡಿ ಇಳೆಗೆ ಸುರಿದಾಗ 
ಆಗುವ ಆನಂದ ಆಹಾ ನಿಸರ್ಗವೇ ನಿನಗೆ ಹೇಳಲು 
ಬಯಸುತ್ತಿದೆ ನನ್ನ ಮನ ಕೋಟಿ ಕೋಟಿ ನಮನ

ಮನಸಿನ ದುಗುಡವೆಲ್ಲ ಮಂಜಿನಂತೆ ಕರಗಿದೆ 
ಬಾಳಲಿ ಆಸೆಗಳು ಕಾರಂಜಿಯಂತೆ ಚಿಮ್ಮುತಿವೆ 
ಹಳೆಯ ಕಹಿನೆನಪ ಮರೆತು ಹೊಸ ಸವಿನೆನಪುಗಳ 
ಸ್ವಾಗತಕ್ಕೆ ಮನವು ಸಜ್ಜಾಗುತಿದೆ 
ಹೇಗಿದ್ದರೂ ಎಲ್ಲಿದ್ದರೂ ಹಂಬಲವೊಂದೇ  
ಸಂತಸದ ಚಿಲುಮೆ ಚಿಮ್ಮುತಿರಲಿ 
ಬಾಳಲಿ ಪ್ರೀತಿ ನಂದಾದೀಪದಂತೆ ಬೆಳಗುತಿರಲಿ 

ಮರುಭೂಮಿಯಂತೆ ಸುಡುತ್ತಿದೆ ನನ್ನ ಮನವು ಇಂದೇಕೋ
ಪದೇ ಪದೇ ನೋವುಗಳೆಂಬ ರವಿಯ ಕಿರಣಗಳು ಬೀಳುತ್ತಿವೆ 
ಶಾಖದ ಕಿರಣಗಳು ಮನಸಿನ ಮರುಭೂಮಿಗೆ ಬಿದ್ದು ಬಿದ್ದು ನಗುತ್ತಿವೆ 
ನೋವಿನ ಅಲೆಯಿಂದ ಬಿಡಿಸಿಕೊಳ್ಳಲು ಎದ್ದು ಎದ್ದು ಸೋಲುತಿರುವೆ 
ನನ್ನ ಸೋಲಿಗೂ ಕೊನೆಯಿಲ್ಲ ನೋವಿಗೂ ಕೊನೆಯಿಲ್ಲ 
ಅಂದಮೇಲೆ ಈ ಉಸಿರೇಕೆ ನಿಲ್ಲುತ್ತಿಲ್ಲ .... ??????????

ನನ್ನ ಹೃದಯದ ಕದವ ತೆಗೆದು ಬಲಗಾಲಿಟ್ಟು ಬಂದು 
ಮನಸೆಂಬ ಮಲ್ಲಿಗೆಗೆ ಮುತ್ತೆಂಬ ಪರಿಮಳವ ಸುರಿಸಿದೆ 
ನನ್ನ ಕಣ್ಣಿನ ರೆಪ್ಪೆಯಲಿ ಒಲವಿನ ಮಳೆಯ ಹರಿಸುತ 
ನಿನ್ನ ತೋಳೆಂಬ ಹಾರದಲಿ ನನ್ನ ಶಾಶ್ವತವಾಗಿ ಬಂಧಿಸಿದೆ 
ನನ್ನ ತನು ಮನದ ಉಸಿರಲಿ ಹಸಿರಂತೆ ಬೆರೆತು 
ಬಾಳ ಜ್ಯೋತಿಯಾಗಿ ಸದಾ ಸೂರ್ಯನಂತೆ ಮಿಂಚುತಿರುವೆ

ಮನಸಿನ ಮಾತುಗಳೆಲ್ಲ 
ಮನಸಲ್ಲೇ ಮರಣ ಹೊಂದುತ್ತಿವೆ  
ಕನಸಿನ ಕೂಸುಗಳೆಲ್ಲ 
ಕರುಳಲ್ಲೇ ಕೊನೆಯುಸಿರೆಳೆಯುತ್ತಿವೆ